ພະແນກເຕັກໂນໂລຊີຂໍ້ມູນຂ່າວສານ ກົມຂໍ້ມູນຂ່າວສານ ແລະ ຝຶກອົບຮົມປຶກສາຫາລື ແລະ ຜ່ານແຜນດຳເນີນວຽກງານປະຈຳປີ 2025
ໃນຕອນເຊົ້າວັນທີ 07 ມັງກອນ 2025 ທີ່ຫ້ອງປະຊຸມທາງໄກຊັ້ນ 4 ພະແນກເຕັກໂນໂລຊີຂໍ້ມູນຂ່າວສານ ກົມຂໍ້ມູນຂ່າວສານ ແລະ ຝຶກອົບຮົມໄດ້ປຶກສາຫາລື ແລະ ຜ່ານແຜນດຳເນີນວຽກງານປະຈຳປີ 2025 ເຂົ້າຮ່ວມ ແລະ ໃຫ້ກຽດເປັນປະທານ ທ່ານ ວັນຕຸລາ ຣັກນຸດ ກຳມະການຄະນະພັກ, ຫົວໜ້າກົມຂໍ້ມູນຂ່າວສານ ແລະ ຝຶກອົບຮົມ ພ້ອມດ້ວຍພະນັກງານພາຍໃນພະແນກ.
ໃນພິທີ ທ່ານ ກົງເພັດ ສີອຸດົມ ຮອງຫົວໜ້າພະແນກ ໄດ້ສະຫຼຸບສັງລວມຜົນສຳເລັດ, ຂໍ້ຄົງຄ້າງ ແລະ ວິທີແກ້ໄຂວຽກງານຂອງພະແນກປະຈຳປີ2024 ແລະ ແຈ້ງແຜນດຳເນີນງານປະຈຳປີ 2025 ໂດຍຕິດພັນກັບການຕິດຕາມ, ຄຸ້ມຄອງ ແລະ ພັດທະນາລະບົບເວັບໄຊຢູ່ສູນກາງ ແລະ ທ້ອງຖິ່ນ; ແຜນການສະໜອງຂໍ້ມູນຂ່າວສານ ແລະ ເອກະສານຕ່າງໆ, ໃນໂອກາດສະເຫຼີມສະຫຼອງ 3 ວັນປະຫວັດສາດພັກຂອງຊາດ; ວຽກງານພັດທະນາລະບົບໄອຊີທີ, ວຽກງານຄຸ້ມຄອງ ແລະ ນຳໃຊ້ລະບົບຫ້ອງປະຊຸມທາງໄກ, ວຽກງານຕິດຕາມ, ກວດກາ ແລະ ສົ່ງເສີມການນຳໃຊ້ລະບົບຂອງພາກລັດພາຍໃນ ຄອສພ.
ໃນຕອນທ້າຍປະທານໄດ້ສະແດງຄວາມຍ້ອງຍໍຊົມເຊີຍຕໍ່ການຈັດຕັ້ງປະຕິບັດໜ້າທີ່ວຽກງານໃນຕະຫຼອດໃນໄລຍະ1ປີຜ່ານມາເຊິ່ງມີບາງດ້ານແມ່ນເຮັດໄດ້ດີລື່ນຄາດໝາຍ ແລະ ຍັງມີບາງດ້ານຍັງຄົງຄ້າງຕ້ອງໄດ້ສືບຕໍ່ແກ້ໄຂ; ທັງໃຫ້ທິດຊິ້ນຳເນັ້ນໜັກໃນການສືບຕໍ່ປະຕິບັດຕາມແຜນດຳເນີນງານປະຈຳປີ 2025ທີ່ກຳນົດໄວ້ໂດຍປະສານງານສົມທົບກັບບັນດາແຂວງໃນການເຄື່ອນໄຫວວຽກງານທີ່ຈະເຮັດໃນຕໍ່ໜ້າ, ສືບຕໍ່ແລກປ່ຽນບົດຮຽນກັບອ້ອມຂ້າງສູນກາງພັກ ແນ່ໃສ່ເພື່ອເຮັດໃຫ້ແຜນການດຳເນີນງານປະຈຳປີໃຫ້ມີຄວາມອຸດົມສົມບູນທາງເນື້ອໃນ ແລະ ເປັນບ່ອນອີງໃນການຈັດຕັ້ງປະຕິບັດໜ້າທີ່ວຽກງານຂອງພະແນກໃຫ້ມີຄວາມວ່ອງໄວທັນກັບຄວາມຮຽກຮ້ອງຕ້ອງການຂອງໜ້າທີ່ວຽກງານໃນຍຸກປັດຈຸບັນ.
