ພິທີປາຖະກະຖາວັນຊາດແຫ່ງ ສາທາລະນະລັດ ສັງຄົມນິຍົມ ຫວຽດນາມຄົບຮອບ 80 ປີ(02/09/1945-02/09-2025)
ໃນຕອນເຊົ້າວັນທີ 27 ສິງຫາ 2025 ທີ່ຫ້ອງປະຊຸມໃຫຍ່ ຄະນະໂຄສະນາອົບຮົມສູນກາງພັກໄດ້ຈັດພິທີປາຖະກະຖາ ວັນຊາດແຫ່ງ ສາທາລະນະລັດ ສັງຄົມນິຍົມ ຫວຽດນາມ ຄົບຮອບ 80 ປີ(02/09/1945-02/09-2025) ໂດຍການເຂົ້າຮ່ວມຂອງ ສະຫາຍ ຫງວຽນ ມິງ ເຕິມ (Nguyen Minh Tam) ເອກອັກຄະລັດຖະທູດຜູ້ມີອໍານາດເຕັມແຫ່ງ ສສ ຫວຽດນາມ ປະຈໍາ ສປປ ລາວ, ສະຫາຍ ນ. ວິລະວອນ ພັນທະວົງ ຄະນະປະຈຳພັກ, ຮອງຫົວໜ້າຄະນະໂຄສະນາອົບຮົມສູນກາງພັກ; ພ້ອມນີ້ຍັງມີບັນດາຄະນະພັກ, ພະນັກງານຄະນະໂຄສະນາອົບຮົມສູນກາງພັກທັງໝົດເຂົ້າຮ່ວມ.
ກ່ອນຈະເລີ່ມເຂົ້າສູ່ພິທີປາຖະກະຖາ ສະຫາຍ ນ. ວິລະວອນ ພັນທະວົງ ຄະນະປະຈຳພັກ, ຮອງຫົວໜ້າຄະນະໂຄສະນາອົບຮົມສູນກາງພັກ ໄດ້ຂຶ້ນກ່າວຕ້ອນຮັບສະຫາຍ ຫງວຽນ ມິງ ເຕິມ (Nguyen Minh Tam) ເອກອັກຄະລັດຖະທູດຜູ້ມີອໍານາດເຕັມແຫ່ງ ສສ ຫວຽດນາມ ປະຈໍາ ສປປ ລາວ ເຊິ່ງໄດ້ກ່າວເຖິງ ສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ຫວຽດນາມ – ລາວ ນັບມື້ພັດທະນາ ຢ່າງເລິກເຊິ່ງ, ກວ້າງຂວາງ, ແທດຕົວຈິງ ແລະ ມີປະສິດທິຜົນ; ນໍາເອົາຜົນປະໂຫຍດອັນໃຫຍ່ຫຼວງໃຫ້ແກ່ທັງສອງປະເທດ.
ຫຼັງຈາກນັ້ນສະຫາຍ ຫງວຽນ ມິງ ເຕິມ (Nguyen Minh Tam) ເອກອັກຄະລັດຖະທູດ ວິສາມັນຜູ້ມີອໍານາດເຕັມແຫ່ງ ສສ ຫວຽດນາມ ປະຈໍາ ສປປ ລາວ ໃຫ້ກຽດຂຶ້ນປາຖະກະຖາ ກ່ຽວກັບມູນເຊື້ອການຕໍ່ສູ້ຢ່າງພິລະອາດຫານຕະຫຼອດໄລຍະ80ປີຜ່ານມາ. ວັນທີ 2 ກັນຍາ ປີ 1945, ຢູ່ສະໜາມຫຼວງບາດິ່ງ ນະຄອນຫຼວງຮ່າໂນ້ຍ, ປະທານ ໂຮ່ຈິມິນ ໄດ້ອ່ານບົດຖະແຫຼງການປະກາດເອກະລາດ ໃຫ້ທົ່ວປວງຊົນທັງຊາດຫວຽດນາມ ແລະ ທົ່ວໂລກຮັບຮູ້ ກ່ຽວກັບຄວາມເປັນເອກະລາດ, ອິດສະຫຼະພາບ, ຄວາມສະເໝີພາບຂອງຊາດຫວຽດນາມ. ນັບແຕ່ນັ້ນເປັນຕົ້ນມາ, ປະຊາຊົນຫວຽດນາມໄດ້ຖືເອົາ ວັນທີ 2 ກັນຍາ ຂອງທຸກໆປີ ເປັນ “ວັນບຸນເອກະລາດ”. ຈາກດິນແດນແຫ່ງໜຶ່ງທີ່ບໍ່ມີຊື່ໃນແຜນທີ່ໂລກ, ຖືກສົງຄາມທຳລາຍຢ່າງໜັກໜ່ວງ, ໃນໄລຍະ 80 ປີທີ່ຜ່ານມາ, ພາຍໃຕ້ການນຳພາຂອງພັກກອມມູນິດຫວຽດນາມ, ຄຳສາບານແຫ່ງຄວາມເປັນເອກະລາດ ດ້ວຍແນວຄິດອັນເປັນອຳມະຕະທີ່ວ່າ “ບໍ່ມີສິ່ງໃດທີ່ປະເສີດເລີດລໍ້າເໜືອກວ່າເອກະລາດ ແລະ ອິດສະຫຼະພາບ”, ທົ່ວປວງຊົນທັງຊາດຫວຽດນາມ ໄດ້ສາມັກຄີເປັນຈິດໜຶ່ງໃຈດຽວ, ຮ່ວມກັບນໍ້າໃຈສາມັກຄີສາກົນອັນບໍລິສຸດຜຸດຜ່ອງ ນໍາເອົາການປະຕິວັດຂອງຫວຽດນາມ ຈາກໄຊຊະນະນີິ້ ໄປສູ່ໄຊຊະນະໃໝ່, ປະຕິບັດສຳເລັດພາລະກິດປົດປ່ອຍຊາດ ແລະ ທ້ອນໂຮມປະເທດຊາດເປັນເອກະພາບ, ດຳເນີນພາລະກິດປ່ຽນແປງໃໝ່ສຳເລັດຜົນ, ກ້າວໄປສູ່ຈຸດໝາຍສັງຄົມນິຍົມ ຢ່າງໜັກແໜ້ນ.