ໃນຕອນບ່າຍຂອງວັນທີ 28 ພະຈິກ 2025 ຄະນະໂຄສະນາອົບຮົມສູນກາງພັກໄດ້ຈັດພິທີປະດັບຫຼຽນກາລະນຶກ 50 ປີວັນສະຖາປະນາ ສປປ ລາວໃຫ້ແກ່ ພະນັກງານລັດຖະກອນ ປະຈຳການ ແລະ ບຳນານທີ່ຂື້ນກັບ ຄະນະໂຄສະນາອົບຮົມສູນກາງພັກ ໃຫ້ກຽດເປັນປະທານໂດຍ ສະຫາຍ ຄຳພັນ ເຜີຍຍະວົງ ຄະນະເລຂາທິການການສູນກາງພັກ, ຫົວໜ້າຄະນະໂຄສະນາອົບຮົມສູນກາງພັກ, ປະທານສະພາທິດສະດີສູນກາງພັກ ເຂົ້າຮ່ວມມີ: ຄະນະປະຈຳພັກ, ຄະນະບໍລິຫານງານພັກຄະນະໂຄສະນາອົບຮົມສູນກາງພັກ, ບັນດາກົມ, ທຽບເທົ່າກົມເຂົ້າຮ່ວມຢ່າງພ້ອມພຽງ.
ໃນພິທີ ສະຫາຍ ລາວປາວຊົ່ງ ນະວົງໄຊ ກຳມະການສູນກາງພັກ ,ຮອງຫົວໜ້າຄະນະໂຄສະນາອົບຮົມສູນກາງພັກ ໄດ້ຂື້ນຜ່ານລັດຖະດຳລັດປະທານປະເທດສະບັບເລກທີ 289/ປປທ, ລົງວັນທີ 20ພະຈິກ2025 ວ່າດ້ວຍການປະດັບຫຼຽນກາລະນຶກ 50ປີ ວັນສະຖາປະນາ ສປປລາວ ແລະ ຜ່ານໃບມອບສິດຂອງນາຍຍົກລັດຖະມົນຕີ ສະບັບເລກທີ 246/ນຍ, ລົງວັນທີ 20/11/2025.
ພິທີປະດັບຫລຽນກາລະນຶກ 50 ປີ ວັນສະຖາປະນາ ສາທາລະນະລັດ ປະຊາທິປະໄຕ ປະຊາຊົນລາວ ເພື່ອເປັນການຫວນຄືນເຖິງວັນມະຫາໄຊຊະນະ ແຫ່ງການປະຕິວັດຊາດ ປະຊາທິປະໄຕ, ລະນຶກເຖິງຜົນງານ ແລະ ການເສຍສະລະອັນຍິ່ງໃຫຍ່ ຂອງ ປະທານ ໄກສອນ ພົມວິຫານ, ປະທານ ສຸພານຸວົງ, ບັນດາຜູ້ນຳ, ນັກປະຕິວັດ, ວິລະຊົນ, ສະມາຊິກພັກ-ພະນັກງານ ຕະຫລອດຮອດປະຊາຊົນລາວບັນດາເຜົ່າ ທີ່ໄດ້ອຸທິດໃຫ້ແກ່ພາລະກິດຕໍ່ສູ້ກູ້ຊາດຢ່າງພິລະອາດຫານ ຈົນສາມາດຍາດໄດ້ເອກະລາດແຫ່ງຊາດ ແລະ ປົດປ່ອຍປະເທດຊາດໄດ້ຢ່າງສົມບູນ ແລະ ສະຖາປະນາເປັນປະເທດ ສາທາລະນະລັດ ປະຊາທິປະໄຕ ປະຊາຊົນລາວ ໃນວັນທີ 2 ທັນວາ 1975.
ໂອກາດດັ່ງກ່າວ, ໄດ້ປະດັບຫຼຽນກາລະນຶກ 50 ປີ ວັນສະຖາປະນາ ສປປ ລາວ ໃຫ້ ຄະນະນຳ ຄອສພ ປະຈຳການ ແລະ ບຳນານ; ຫົວໜ້າກົມ, ທຽບເທົ່າຫົວໜ້າກົມ ປະຈຳການ ແລະ ບຳນານ ໃຫ້ກຽດປະດັບໂດຍ ສະຫາຍ ຄຳພັນ ເຜີຍຍະວົງ ຄະນະເລຂາທິການການສູນກາງພັກ, ຫົວໜ້າຄະນະໂຄສະນາອົບຮົມສູນກາງພັກ, ປະທານສະພາທິດສະດີສູນກາງພັກ ;
ປະດັບຫຼຽນກາລະນຶກ 50 ປີ ວັນສະຖາປະນາ ສປປ ລາວ ໃຫ້ ຮອງຫົວໜ້າກົມ, ຫົວໜ້າພະແນກ ປະຈຳການ ແລະ ບຳນານໃຫ້ກຽດປະດັບໂດຍ ສະຫາຍ ລາວປາວຊົ່ງ ນະວົງໄຊ ກຳມະການສູນກາງພັກ ,ຮອງຫົວໜ້າຄະນະໂຄສະນາອົບຮົມສູນກາງພັກ;
ປະດັບຫຼຽນກາລະນຶກ 50 ປີ ວັນສະຖາປະນາ ສປປ ລາວ ໃຫ້ ຮອງຫົວໜ້າພະແນກ ແລະ ວິຊາການ ປະຈຳການ ແລະ ບຳນານໃຫ້ກຽດປະດັບໂດຍ ສະຫາຍ ນ ວິລະວອນ ພັນທະວົງ ກຳມະການປະຈຳພັກ,ຮອງຫົວໜ້າຄະນະໂຄສະນາອົບຮົມສູນກາງພັກ ລວມທັງໝົດ 561ທ່ານ, ຍິງ 216 ທ່ານ.
