ພິທີພົບປະລະຫວ່າງໜັງສືພິມປະຊາຊົນ ແລະ ໜັງສືພິມເຍິນເຢິນ
ໃນວັນທີ 7 ມິຖຸນານີ້ ທີ່ສຳນັກງານໜັງສືພິມປະຊາຊົນ ສະຫາຍ ວັນໄຊ ຕະວິນຍານ ຮອງຫົວໜ້າຄະນະໂຄສະນາອົບຮົມສູນກາງພັກ (ຄອສພ) ຫົວໜ້າບັນນາທິການໃຫຍ່ ໜັງສືພິມປະຊາຊົນ ພ້ອມຄະນະ ໄດ້ຈັດພິທີພົບປະສອງຝ່າຍກັບ ສະຫາຍ ເລ ກວັກ ມິງ ກໍາມະການສູນກາງພັກກອມມູນິດຫວຽດນາມ ຫົວໜ້າບັນນາທິການໃຫຍ່ ໜັງສືພິມ ເຍິນເຢິນຮອງຫົວໜ້າຄະນະໂຄສະນາສຶກສາສູນກາງພັກກອມມູນິດຫວຽດນາມ ປະທານສະມາຄົມນັກຂ່າວແຫ່ງ ສສ ຫວຽດນາມ ພ້ອມຄະນະ.
ໃນພິທີພົບປະ ສະຫາຍ ວັນໄຊ ຕະວິນຍານ ໄດ້ຕາງໜ້າການນຳ ຄອສພ ແລະ ໜັງສືພິມປະຊາຊົນກ່າວຕ້ອນຮັບການເດີນທາງມາຢ້ຽມຢາມສປປ ລາວ ຢ່າງເປັນທາງການ ຂອງຄະນະຜູ້ແທນຂັ້ນສູງຂອງ ໜັງສືພິມ ເຍິນເຢິນ ສສ ຫວຽດນາມເຊິ່ງນໍາໂດຍ ສະຫາຍ ເລ ກວັກ ມິງ ຊຶ່ງສະແດງໃຫ້ເຫັນເຖິງຄວາມສາມັກຄີຮັກແພງ ອັນສະໜິດສະໜົມ, ເປັນການເສີມຂະຫຍາຍມູນເຊື້ອຄວາມສາມັກຄີແບບພິເສດ, ການພົວພັນຮ່ວມມືຮອບດ້ານ ລະຫວ່າງ ສອງພັກ-ສອງລັດ ປະຊາຊົນສອງຊາດ ລາວ-ຫວຽດນາມ ທີ່ມີມາແຕ່ດົນນານໃຫ້ໝັ້ນຄົງຂະໜົງແກ່ນຕະຫຼອດໄປ ເວົ້າລວມ, ເວົ້າສະເພາະ ການພົວພັນຮ່ວມມື ລະຫວ່າງ ໜັງສືພິມ ປະຊາຊົນ ສຽງຂອງສູນກາງພັກປະຊາຊົນ ປະຕິວັດລາວ ແລະ ໜັງສືພິມ ເຢິນເຢິນ ສຽງຂອງສູນກາງພັກ-ລັດ ແລະ ປະຊາຊົນຫວຽດນາມ ນັບມື້ແຕກດອກອອກຜົນ.
ໃນພິທີພົບປະສອງຝ່າຍ ໄດ້ພັດປ່ຽນກັນແຈ້ງໃຫ້ກັນຊາບ ກ່ຽວກັບສະພາບລວມດ້ານການຈັດຕັ້ງ ແລະ ການເຄື່ອນໄຫວວຽກງານຂອງໜັງສືພິມໃນໄລຍະຜ່ານມາ ທັງຂໍ້ສະດວກ, ຂໍ້ຫຍຸ້ງຍາກ ແລະ ສິ່ງທ້າທາຍ. ນອກຈາກນັ້ນ ສອງຝ່າຍ ຍັງໄດ້ທົບທວນຄືນການພົວພັນຮ່ວມມືໃນໄລຍະຜ່ານມາ, ໂດຍສະເພາະກໍແມ່ນການຊ່ວຍຍົກລະດັບດ້ານວິຊາການ ແລະ ການປັບປຸງເວັບໄຊຂອງໜັງສືພິມປະຊາຊົນຈົນສຳເລັດ. ນອກຈາກນີ້ ໄດ້ປຶກສາຫາລືບາງວຽກງານ, ບາງກິດຈະກໍາ ເພື່ອຮັດແໜ້ນ ແລະ ເສີມຂະຫຍາຍການຮ່ວມມືລະຫວ່າງສອງໜັງສືພິມ. ໃນໂອກາດນີ້, ທ່ານ ວັນໄຊ ຕະວິນຍານ ໄດ້ສະເໜີກ່ຽວກັບການຈັດຊຸດຝຶກອົບຮົມດ້ານຕ່າງໆ ໃຫ້ແກ່ພະນັກງານ-ນັກຂ່າວໜັງສືພິມປະຊາຊົນຢູ່ ສສ ຫວຽດນາມ ຫຼື ເຊີນບັນດາຄູອາຈານຈາກສສ ຫວຽດນາມມາຂຶ້ນຫ້ອງສອນຢູ່ລາວ.
ໂອກາດດຽວກັນ, ສະຫາຍ ເລ ກວັກ ມິງ ກໍໄດ້ແຈ້ງສະພາບການຂອງການເຄື່ອນໄຫວວຽກງານຂອງໜັງສືພິມ ເຍິນເຢິນ, ພ້ອມທັງສະແດງຄວາມຂອບໃຈຢ່າງເລິກເຊິ່ງທີ່ທາງໜັງສືພິມປະຊາຊົນລາວໄດ້ໃຫ້ການຕ້ອນຮັບຄະນະຜູ້ແທນຂັ້ນສູງຂອງໜັງສືພິມເຍິນເຢິນຢ່າງອົບອຸ່ນ ແລະ ຫວັງວ່າຈະໄດ້ຕ້ອນຮັບຄະນະຜູ້ແທນຈາກໜັງສືພິມປະຊາຊົນລາວ ກໍຄືພະນັກງານ-ນັກຂ່າວ ທີ່ຈະເດີນທາງໄປຢ້ຽມຢາມ ແລະ ຝຶກອົບຮົມຢູ່ ສສ ຫວຽດນາມໃນເວລາທີ່ເໝາະສົມ.
ໃນວາລະສຸດທ້າຍຂອງພິທີພົບປະ, ສະຫາຍ ວັນໄຊ ຕະວິນຍານ ແລະ ສະຫາຍ ເລ ກວັກ ມິງ ກໍໄດ້ພ້ອມກັນລົງນາມຂໍ້ຕົກລົງການຮ່ວມມື ລະຫວ່າງ ສອງໜັງສືພິມສະບັບໃໝ່ ເພື່ອສືບຕໍ່ຮັດແໜ້ນມູນເຊື້ອການພົວພັນຮ່ວມມືຂອງສອງຝ່າຍໃຫ້ແໜ້ນແຟ້ນກວ່າເກົ່າ ເພື່ອແນໃສ່ຊຸກຍູ້ການພົວພັນຮ່ວມມືໃນວຽກງານໂຄສະນາ, ການຮ່ວມມືໃນຂົງເຂດສື່ມວນຊົນ ເພື່ອປະກອບສ່ວນ ເຂົ້າໃນການເສີມຂະຫຍາຍສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນ ສອງປະເທດ ລາວ – ຫວຽດນາມ. ຂໍ້ຕົກລົງການຮ່ວມມືສະບັບນີ້, ມີຜົນສັກສິດນັບແຕ່ວັນລົງນາມ ແລະ ມີຜົນບັງຄັບໃຊ້ເປັນເວລາ 5 ປີ(2024 ຫາ 2028) ສາມາດຕໍ່ອາຍຸໄດ້ 5 ປີ ຕາມການຕົກລົງເຫັນດີຂອງສອງຝ່າຍ.
ຫຼັງຈາກນັ້ນ ທັງສອງຝ່າຍ ໄດ້ເຂົ້າຮ່ວມພິທີມອບ-ຮັບ ແລະ ເປີດການນໍາໃຊ້ເວັບໄຊ ປັບປຸງໃໝ່ ຂອງໜັງສືພິມປະຊາຊົນ ໂດຍມີ ສະຫາຍ ລາວປາວຊົ່ງ ນະວົງໄຊ ກຳມະການສູນກາງພັກ ຮອງຫົວໜ້າຄະນະໂຄສະນາອົບຮົມສູນກາງພັກ, ສະຫາຍ ເລ ກວັກ ມິງ, ສະຫາຍ ວັນໄຊ ຕະວິນຍານ ຮ່ວມກົດປຸ່ມເພື່ອເປີດນໍາໃຊ້ເວັບໄຊຢ່າງເປັນທາງການ.
ໂອກາດມອບ-ຮັບເວັບໄຊຢ່າງເປັນທາງການ ສະຫາຍ ເລ ກວັກ ມິງ ໄດ້ກ່າວວ່າ: ປັດຈຸບັນການພັດທະນາທາງດ້ານເອເລັກໂຕຣນິກ ຫັນເປັນທັນສະໄໝຂອງສື່ມວນຊົນ ແມ່ນມີຄວາມສໍາຄັນ ເພື່ອໂຄສະນາແນວທາງນະໂຍບາຍຂອງພັກ, ລັດຖະບານ ໃຫ້ໄດ້ຮັບຮູ້ ແລະ ເຂົ້າໃຈຢ່າງເລິກເຊິ່ງໃຫ້ທົ່ວເຖິງ; ການຊ່ວຍເຫຼືອປັບປຸງເວັບໄຊໃໝ່ ໃຫ້ແກ່ໜັງສືພິມປະຊາຊົນ ເປັນການປະຕິບັດຕາມການຊີ້ນໍາ ຄໍາໝັ້ນສັນຍາ ທີ່ໜັງສືພິມເຍິນເຢິນເຄີຍໃຫ້ໄວ້ກັບສະຫາຍ ຫົວໜ້າໂຄສະນາສຶກສາ ສູນກາງພັກກອມມິນິດຫວຽດນາມ ແລະ ຫົວໜ້າຄະນະໂຄສະນາອົບຮົມສູນກາງພັກປະຊາຊົນປະຕິວັດລາວ ມາຮອດມື້ນີ້ ຄໍາໝັ້ນສັນຍາດັ່ງກ່າວໄດ້ຮັບການຈັດຕັ້ງປະຕິບັດເປັນຈິງ.
ສະຫາຍ ເລ ກວັກ ມິງ ກ່າວອີກວ່າ: ພິທີມອບ-ຮັບຄັ້ງນີ້ ບໍ່ໄດ້ໝາຍເຖິງການສິ້ນສຸດໂຄງການຊ່ວຍເຫຼືອ ແຕ່ຍັງຈະສືບຕໍ່ກໍ່ສ້າງທາງດ້ານເຕັກນິກ ແລະ ຝຶກອົບຮົມພະນັກງານ-ນັກຂ່າວໃຫ້ແກ່ ໜັງສືພິມປະຊາຊົນຕໍ່ໄປ.
ສະຫາຍ ວັນໄຊ ຕະວິນຍານ ໄດ້ກ່າວສະແດງຄວາມຂອບໃຈຕໍ່ໜັງສືພິມ ເຍິນເຢິນ, ພ້ອມທັງໃຫ້ຄໍາໝັ້ນສັນຍາວ່າ ຈະເອົາໃຈໃສ່ຄຸ້ມຄອງ ນໍາໃຊ້ເວັບໄຊ ດັ່ງກ່າວນີ້ໃຫ້ເກີດປະໂຫຍດສູງສຸດ.
ເວັບໄຊ ປັບປຸງໃໝ່ ຂອງໜັງສືພິມປະຊາຊົນ ມີຊື່ເວບແມ່ນ pasaxon-org-la ເປັນການນໍາໃຊ້ລະບົບຊັອບແວຣ ທີ່ທັນສະໄໝທີ່ສຸດ ເມື່ອທຽບກັບບັນດາອົງການສື່ມວນຊົນຂອງສປປ ລາວ. ເພື່ອຕອບສະໜອງຕາມຄວາມຮຽກຮ້ອງຕ້ອງການຂອງສື່ມວນຊົນທີ່ທັນສະໄໝ ແລະ ໃນການສະໜອງດ້ານຂໍ້ມູນຕ່າງໆ ໂດຍໃຊ້ລະບົບຈັດການເນື້ອຫາສະລະ CMS (Content Management System) ທີ່ຕິດຕັ້ງເວັບໄຊລະບົບເບຕາ (Beta) ຊຶ່ງເປັນການຍົກສູງຄຸນນະພາບການຈັດວາງເນື້ອໃນ, ຮູບພາບ ໃນຮູບແບບຕ່າງໆຢູ່ໜ້າເວັບໄຊ ໃຫ້ມີສີສັນໂດດເດັ່ນ ເປັນເອກະລັກ ເພື່ອດຶງດູດຜູ້ເຂົ້າຊົມ ເຂົ້າອ່ານໃນອະນາຄົດ.
