ໃນວັນທີ 18 ກໍລະກົດ 2024 ທີ່ມະຫາວິທະຍາໄລເຈີ້ຈ່ຽງ ເມືອງຈິ່ນຮົວ, ສປ ຈີນ ໄດ້ເປີດພິທີສໍາມະນາຂື້ນພາຍໃຕ້ຫົວຂໍ້: “ອົງການຈັດຕັ້ງນັກຂ່າວ ແລະ ອົງການສື່ມວນຊົນສຳລັບປະເທດ ໜຶ່ງແລວ-ໜຶ່ງເສັ້ນທາງ” ພາຍໃຕ້ການເປັນເຈົ້າພາບຂອງກະຊວງການຄ້າແຫ່ງສາທາລະນະລັດ ປະຊາຊົນຈີນ ເປັນກຽດເຂົ້າຮ່ວມພິທີເປີດສຳມະນາ ຂອງທ່ານ ຈ່າງ ເກິ່ນຟູ້ ຮອງຜູ້ອຳນວຍການມະ ຫາວິທະຍາໄລສ້າງຄູເຈີ່ຈ່ຽງ. ກອງປະຊຸມສຳມະນາຄັ້ງນີ້ຈະໄດ້ຮັບຟັງການບັນຍາຍຈາກຜູ້ຊ່ຽວຊານ ແລະ ນັກວິຊາການທີ່ມີຊື່ສຽງສະເພາະດ້ານກ່ຽວກັບສື່ມວນຊົນຂອງຈີນ ແລະ ສື່ແບບໃໝ່ (ສື່ເອເລັກໂຕຣນິກ) ພ້ອມກັນນັ້ນກໍຈະໄດ້ນໍາພານັກສຳມະນາກອນລົງໄປທັດສະນະສຶກສາຕົວຈິງ.
ໃນພິທີດັ່ງກ່າວ ໄດ້ຮັບຟັງການລາຍງານໂດຍຫຍໍ້ກ່ຽວກັບສະພາບລວມຂອງ ສປ ຈີນ ນັບແຕ່ອາດີດຈົນເຖິງປະຈຸບັນ ເປັນຕົ້ນແມ່ນ: ການພັດທະນາເສດຖະກິດ, ວັດທະນະທຳ-ສັງຄົມ, ການດຳລົງຊີວິດຂອງປະຊາຊົນບັນດາເຜົ່າ, ການພັດທະນາອຸດສະຫະກຳ, ການຄ້າ ແລະ ນະວັດຕະກຳເຕັກໂນໂລຊີໃໝ່. ນອກຈາກນີ້ ທ່ານຍັງໄດ້ຍົກໃຫ້ເຫັນແນວຄວາມຄິດຂໍ້ລິເລີ່ມ “ໜຶ່ງແລວ-ໜຶ່ງເສັ້ນທາງ” ຂອງ ທ່ານ ສີ ຈິ້ນຜິງ ປະທານປະເທດ ແຫ່ງ ສປ ຈີນ ເຊິ່ງເປັນເສັ້ນທາງໄປສູ່ສັນຕິພາບ, ຄວາມໝັ້ນຄົງ, ການພັດທະນາແບບຍືນຍົງ, ຄວາມສີວິໄລ ແລະ ຄວາມກ້າວໜ້າຂອງມວນມະນຸດຂອງໂລກ. ໃນກອງປະຊຸມສຳມະນາຄັ້ງນີ້ມີນັກສຳມະນາກອນເຂົ້າຮ່ວມທັງໝົດ 36 ທ່ານ, ມາຈາກ 11 ປະເທດ, 4 ທະວີບ ແລະ ການສຳມະນາຈະດຳເນີນໄປເປັນເວລາ 14 ວັນ.
ໃນໂອກາດດັ່ງກ່າວທ່ານ ຈ່າງ ເກິ່ນຟູ້ ຍັງໄດ້ກ່າວຢໍ້າຕື່ມອີກວ່າ: ການສຳມະນາໃນຄັ້ງນີ້ ຈະເປັນເວທີໜຶ່ງໃນການສ້າງຄວາມເຂັ້ມແຂງໃຫ້ແກ່ທຸກທ່ານເພື່ອແລກປ່ຽນປະສົບການ ແລະ ບາງຂໍ້ຄິດເຫັນຕໍ່ກັບການພັດທະນາອຸດສາຫະກຳສື່. ພວກເຮົາຫວັງວ່າການສຳມະນາຄັ້ງນີ້ບໍ່ພຽງແຕ່ເພີ່ມທະວີການຮ່ວມມືດ້ານສື່ ລະຫວ່າງຈີນກັບບັນດາປະເທດ “ໜຶ່ງແລວ ໜຶ່ງເສັ້ນທາງ” ເທົ່ານັ້ນ ຫາກຍັງເປັນຊຸກຍູ້ການຮ່ວມມືຂອງຜູ້ເຂົ້າຮ່ວມທັງໝົດ ເພື່ອຈັດການກັບສິ່ງທ້າທາຍໃນຍຸກດີຈີຕ້ອນ ແລະ ປະກອບສ່ວນເຂົ້າໃນການສົ່ງເສີມການພົວພັນຮ່ວມມືກັນໃນລະດັບໂລກ ກໍຄືການແລກປ່ຽນບົດຮຽນໃນວຽກງານສື່ແບບໃໝ່ (ສື່ເອເລັກໂຕຣນິກ).