ທ່ານ ນາງ ວິລະວອນ ພັນທະວົງ ລົງເຄື່ອນໄຫວວຽກງານ ຢູ່ແຂວງອັດຕະປື
ທ່ານ ນາງ ວິລະວອນ ພັນທະວົງ ກໍາມະການປະຈໍາພັກ ປະທານກວດກາຄະນະພັກ ຮອງຫົວໜ້າຄະນະໂຄສະນາອົບຮົມສູນກາງພັກ (ຄອສພ) ພ້ອມຄະນະ ໄດ້ເຄື່ອນໄຫວຢ້ຽມຢາມ ແລະ ເຮັດວຽກຢູ່ແຂວງອັດຕະປື ຊຶ່ງໃນວັນທີ 25 ພະຈິກຜ່ານມາ, ທ່ານຮອງຫົວໜ້າ ຄອສພ ພ້ອມຄະນະ ໄດ້ເຂົ້າຢ້ຽມຂໍ່ານັບ ທ່ານ ພົນໂທ ວັນທອງ ກອງມະນີ ກໍາມະການສູນກາງພັກ ເລຂາພັກແຂວງ ເຈົ້າແຂວງອັດຕະປື ເພື່ອແຈ້ງຈຸດປະສົງຂອງການມາເຄື່ອນໄຫວ ແລະ ເຮັດວຽກຢູ່ແຂວງອັດຕະປື ໃຫ້ທ່ານເຈົ້າແຂວງໄດ້ຮັບຊາບ.
ຈຸດປະສົງຂອງການເຄື່ອນໄຫວວຽກງານຢູ່ແຂວງອັດຕະປືໃນຄັ້ງນີ້ ກໍເພື່ອລົງຕິດຕາມ, ຊຸກຍູ້ວຽກງານກວດກາ ຢູ່ຄະນະໂຄສະນາອົບຮົມຮົມແຂວງ, ຄະນະໂຄສະນາອົບຮົມເມືອງ; ເພື່ອເຜີຍແຜ່ເອກະສານສໍາຄັນຈໍານວນໜຶ່ງ, ເປັນຕົ້ນແມ່ນຂໍ້ຕົກລົງວ່າດ້ວຍການຈັດຕັ້ງ ແລະ ການເຄື່ອນໄຫວ ຂອງກົມກວດກາ (ຄອສພ) ກໍຄືຕິດຕາມ, ຊຸກຍູ້ການຈັດຕັ້ງປະຕິບັດພາລະບົດບາດ, ສິດ, ໜ້າທີ່, ຄວາມຮັບຜິດຊອບ ຂອງຄະນະບໍລິຫານງານແຂວງ, ການຈັດຕັ້ງປະຕິບັດບັນດາແຜນງານ ແລະ ຄວາມຮັບຜິດຊອບຂອງຕົນ; ແນະນໍາທັດສະນະຄວາມຮັບຮູ້-ຄວາມເຂົ້າໃຈຂອງຄະນະນໍາ ແລະ ສະມາຊິກພັກ-ພະນັກງານ ແຕ່ລະຂັ້ນ ໃຫ້ມີຄວາມໜັກແໜ້ນ, ເຂັ້ມແຂງທາງດ້ານແນວຄິດ, ການຈັດຕັ້ງ ແລະ ແບບແຜນວິທີນໍາພາ; ເສີມຂະຫຍາຍດ້ານຕັ້ງໜ້າ ແລະ ປັບປຸງແກ້ໄຂດ້ານປະກົດການຫຍໍ້ທໍ້ ຂອງສະມາຊິກພັກ-ພະນັກງານ ແຕ່ລະຂັ້ນ; ຕິດຕາມຊຸກຍູ້ການຈັດຕັ້ງຜັນຂະຫຍາຍ ແລະ ການຈັດຕັ້ງປະຕິບັດແນວທາງນະໂຍບາຍຂອງພັກ-ລັດ, ມະຕິກອງປະຊຸມໃຫຍ່ ຄັ້ງທີ XI ຂອງພັກ, ມະຕິກອງປະຊຸມໃຫຍ່ຄະນະບໍລິຫານງານພັກແຂວງ ກໍຄືມະຕິກອງປະຊຸມໃຫຍ່ ຄະນະບໍລິຫານພັກເມືອງ; ຕິດຕາມ, ຊຸກຍູ້ການເຄື່ອນໄຫວວຽກງານວິຊາສະເພາະ ຂອງຄະນະໂຄສະນາອົບຮົມແຂວງອັດຕະປື ກໍຄືຄະນະໂຄສະນາອົບຮົມເມືອງຈໍານວນໜຶ່ງ ຂອງແຂວງອັດຕະປື.
ນອກຈາກນັ້ນ, ທ່ານ ນາງ ວິລະວອນ ພັນທະວົງ ພ້ອມຄະນະ ໄດ້ເຄື່ອນໄຫວວຽກງານຢູ່ເມືອງສາມັກຄີໄຊ, ເມືອງໄຊເສດຖາ ແລະ ເມືອງພູວົງ ແຂວງອັດຕະປື ຕື່ມອີກ.
(ຂ່າວ: ນາງ ສີມອນ, ພາບ: ນາງ ບຸນປະຄອຍ)
