ພິທີເປີດຊຸດອົບຮົມວຽກງານໄອທີ ໃຫ້ແກ່ຄະນະໂຄສະນາອົບຮົມແຂວງ ຄຳມ່ວນ.
ໃນລະຫວ່າງວັນທີ 14-18 ສິງຫາ 2022 ຜ່ານມາ, ກົມຂໍ້ມູນຂ່າວສານ ຄະນະໂຄສະນາອົບຮົມສູນກາງພັກ ໄດ້ສົມທົບກັບຄະນະໂຄສະນາອົບຮົມແຂວງຄຳມ່ວນ ເປີດຊຸດຝຶກອົບຮົມວຽກງານໄອທີ ໃຫ້ແກ່ພະນັກງານຄະນະໂຄສະນາອົບຮົມແຂວງ ຢູ່ທີ່ຫ້ອງປະຊຸມຂອງຄະນະໂຄສະນາອົບຮົມແຂວງຄຳມ່ວນ ພາຍໃຕ້ການເປັນປະທານ ແລະ ໃຫ້ກຽດກ່າວເປີດໂດຍທ່ານ ອຸດອນ ສຸດທິລາດ ຮອງຫົວໜ້າຄະນະໂຄສະນາອົບຮົມແຂວງຄຳມ່ວນ, ເຂົ້າຮ່ວມມີທ່ານ ນ. ມອນສະຫວັນ ແສນໄຕ ຮອງຫົວໜ້າກົມຂໍ້ມູນຂ່າວສານ ຄະນະໂຄສະນາອົບຮົມສູນກາງພັກ ພ້ອມດ້ວຍຄະນະ, ມີພະນັກງານຈາກຄະນະໂຄສະນາອົບຮົມແຂວງ ແລະ ເມືອງ ເຂົ້າຮ່ວມທັງໝົດ 24 ທ່ານ, ຍິງ 15 ທ່ານ.
ຈຸດປະສົງໃນການຝຶກອົບຮົມຄັ້ງນີ້ ເພື່ອແນ່ໃສ່ຍົກລະດັບລະດັບຄວາມຮູ້, ຄວາມສາມາດ ກ່ຽວກັບວຽກງານໄອທີ ໃຫ້ແກ່ພະນັກງານທີ່ເຮັດວຽກງານໂຄສະນາອົບຮົມ ຢູ່ຂັ້ນແຂວງ ແລະ ຂັ້ນເມືອງ ໃນການນໍາໃຊ້ເຄື່ອງມືເຕັັກໂນໂລຊີທີທັນສະໄໝ ເຂົ້າໃນປະຕິບັດໜ້າທີ່ວຽກງານວິຊາສະເພາະ ເພື່ອຕອບສະໜອງຕາມຄວາມຮຽກຮ້ອງຕ້ອງການຂອງໜ້າທີ່ວຽກງານໃນໄລຍະໃໝ່ ທັງເປັນການສ້າງບາດກ້າວຫັນປ່ຽນໃໝ່ຂອງວຽກງານການເມືອງ-ແນວຄິດ ຕາມທິດຍົກສູງຄຸນນະພາບ ແລະ ຫັນເປັນທັນສະໄໝເທື່ອລະກ້າວ.
ເນື້ອໃນການຝຶກອົບຮົມປະກອບມີ 3 ບົດດັ່ງລຸ່ມນີ້:
1.ຄວາມຮູ້ພື້ນຖານຂອງອຸປະກອນຄອມພິວເຕີ (Hardware)
2.ການຕິດຕັ້ງ Windows ແລະ Program
3.ວິທີການບໍາລຸງຮັກສາຄອມພິວເຕີ
ຊຸດຝຶກອົບຮົມຄັ້ງນີ້ໄດ້ດຳເນີນເປັນເວລາ 3 ວັນຄືວັນທີ 15-18/08/2022 ຈຶ່ງໄດ້ປິດລົງຢ່າງເປັນທາງການ, ໃຫ້ກຽດກ່າວປິດ ແລະ ມອບໃບຢັ້ງຢືນຄັ້ງນີ້ໂດຍ ທ່ານ ອຸດອນ ສຸດທິລາດ ຮອງຫົວໜ້າຄະນະໂຄສະນາອົບຮົມແຂວງຄຳມ່ວນ. ໃນໂອກາດທີ່ມີຄວາມໝາຍສຳຄັນດັ່ງກ່າວທ່ານຍັງໄດ້ໂອ້ລົມຕໍ່ນັກສຳມະນາກອນ, ເຊິ່ງທ່ານໄດ້ຮຽກຮ້ອງໃຫ້ນັກສຳມະນາກອນທຸກທ່ານ ນຳເອົາບົດຮຽນທີ່ໄດ້ຈາກຊຸດຝຶກອົບຮົມໃນຄັ້ງນີ້ ນຳໄປຈັດຕັ້ງປະຕິບັດ ໝູນໃຊ້ເຂົ້າໃນໜ້າທີ່ວຽກງານ ໃຫ້ໄດ້ຮັບການພັດທະນາ ແລະ ມີປະສິດທິຜົນໃນຕໍ່ໜ້າ.
ຫຼັງຈາກສຳເລັດຊຸດຝຶກອົບຮົມ ຄະນະໂຄສະນາອົບຮົມແຂວງໄດ້ນຳພາຄະນະຈາກສູນກາງ ພ້ອມດ້ວຍນັກສຳມະນາກອນທັງໝົດ ໄປທັດສະນະສຶກສາຢູ່ຂຸນນ້ຳຄຳດິບ ຢູ່ເມືອງມະຫາໄຊ.
