ອົບຮົມວຽກງານ 3 ສ້າງ ໃຫ້ແກ່ເລຂາໜ່ວຍພັກບ້ານ
ແລະ ພະນັກງານຫຼັກແຫຼ່ງທົ່ວເມືອງທ່າໂທມ ແຂວງໄຊສົມບູນ
ໃນວັນທີ 1-3 ກຸມພາ 2024 ຄະນະໂຄສະນາອົບຮົມສູນກາງພັກ ແລະ ຄະນະໂຄສະນາອົບຮົມແຂວງໄຊສົມບູນໄດ້ລົງສົມທົບຄະນະໂຄສະນາອົບຮົມເມືອງທ່າໂທມ ຈັດຕັ້ງຊຸດອົບຮົມຄວາມຮູ້ພື້ນຖານດ້ານການເມືອງ-ການປົກຄອງ ແລະ ການສ້າງບ້ານພັດທະນາໃຫ້ແກ່ເລຂາໜ່ວຍພັກບ້ານ, ນາຍບ້ານ 26 ບ້ານ ແລະ ພະນັກງານຫຼັກແຫຼ່ງລົງກໍ່ສ້າງຮາກຖານການເມືອງ ຂອງເມືອງທ່າໂທມ ແຂວງໄຊສົມບູນ. ໃຫ້ກຽດເປັນປະທານ ແລະ ກ່າວເປີດໂດຍສະຫາຍ ສຸກສະເຫຼີມ ສົມມະນີ ກຳມະການພັກແຂວງ ເລຂາພັກເມືອງ ເຈົ້າເມືອງ ເມືອງທ່າໂທມ.
ຊຸດອົບຮົມຄັ້ງນີ້ມີຜູ້ເຂົ້າຮ່ວມທັງໝົດ 50 ຄົນ, ຍິງ 11 ຄົນ ຊຶ່ງມາຈາກ 26 ບ້ານ ແລະ ພະນັກງານຫຼັກແຫຼ່ງລົງກໍ່ສ້າງຮາກຖານການເມືອງ 29 ສະຫາຍ, ຍິງ 8 ສະຫາຍ; ເລຂາຄະນະພັກບ້ານ 21, ຍິງ 3 ສະຫາຍ ຊຶ່ງໃນນັ້ນ ມີສະມາຊິກພັກທັງໝົດ 50 ສະຫາຍ, ຍິງ 11 ສະຫາຍ; ເນື້ອໃນເອກະສານອົບຮົມປະກອບມີ 6 ບົດ ຄື: ບົດທີ 1: ຊາດລາວ, ຄົນລາວ ແລະ ມູນເຊື້ອອັນສະຫງ່າລາສີຂອງປະຊາຊົນລາວ, ບົດທີ 2: ລະບົບການເມືອງ ແລະ ການປົກຄອງ ຢູ່ ສປປ ລາວ, ບົດທີ 3: ຍົກສູງຄວາມສາມາດນໍາພາຂອງໜ່ວຍພັກບ້ານ, ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ, ບົດທີ 4: ການສ້າງບ້ານພັດທະນາ, ບົດທີ 5: ການແກ້ໄຂຄວາມທຸກຍາກ ດ້ວຍການຜະລິດເປັນສິນຄ້າ ແລະ ບົດທີ 6: ແນວທາງປ້ອງກັນຊາດ-ປ້ອງກັນຄວາມສະຫງົບທົ່ວປວງຊົນຮອບດ້ານ.
ຜ່ານການຈັດຕັ້ງອົບຮົມແມ່ນສຳເລັດຕາມຈຸດປະສົງ-ລະດັບຄາດໝາຍ, ຜູ້ເຂົ້າອົບຮົມລ້ວນແຕ່ແມ່ນຜູ້ທີ່ເປັນຫຼັກ ແຫຼ່ງສໍາຄັນຂອງແຕ່ລະບ້ານ; ຜູ້ບັນຍາຍເອກະສານສ່ວນຫຼາຍຜູ້ທີ່ມີບົດບາດ ແລະ ປະສົບການ ຊຶ່ງສາມາດອະທິບາຍ, ຊີ້ແຈງ ແລະ ສົມທຽບລະຫວ່າງທິດສະດີກັບພຶດຕິກຳຕົວຈິງໄດ້ຢ່າງກວ້າງຂວາງ, ເລິກເຊິ່ງ ເຮັດໃຫ້ຜູ້ເຂົ້າອົບຮົມເຂົ້າໃຈເນື້ອໃນເອກະສານເປັນຢ່າງດີ ແລະ ຜູ້ອົບຮົມມີຄວາມຫ້າວຫັນ, ຕັ້ງໃຈເຂົ້າຮ່ວມອົບຮົມ ແລະ ມີການແລກປ່ຽນຄຳເຫັນກັບຜູ້ບັນຍາຍເອກະສານມີບັນຍາກາດຢ່າງຟົດຟື້ນ.
ໃນຕອນທ້າຍຂອງການຝຶກອົບຮົມ ແມ່ນໄດ້ມີພິທີມອບໃບຢັ້ງຢືນໃຫ້ຜູ້ເຂົາຮ່ວມອົບຮົມ ຊຶ່ງໃຫ້ກຽດມອບໂດຍ ສະຫາຍ ຄົວຈັ້ງ ດຣາເຊັ້ງ ກຳມະການພັກແຂວງ ຫົວໜ້າຄະນະໂຄສະນາອົບຮົມເເຂວງໄຊສົມບູນ ແລະ ໃຫ້ກຽດໂອ້ລົມ ພ້ອມທັງກ່າວປິດຊຸດຝຶກອົບຮົມດັ່ງກ່າວໂດຍ ສະຫາຍ ຄໍາເປິ້ນ ໄຂຄໍາໝັ້ນ ຮອງເລຂາພັກເມືອງ ຮອງເຈົ້າເມືອງ ເມືອງທ່າໂທມ.
ໂດຍ: ສີວອນ ຈັນສຸລີ