ພິທີປະກາດ ຜະລິດຕະພັນການຄົ້ນຄວ້າແນວຄິດ ໄກສອນ ພົມວິຫານ
ກ່ຽວກັບການປ່ຽນແປງໃໝ່ຢູ່ ສປປ ລາວ
ໃນຕອນເຊົ້າວັນທີ 22 ທັນວາ 2022 ຢູ່ທີ່ຫ້ອງປະຊຸມໃຫຍ່ ຄະນະໂຄສະນາອົບຮົມສູນກາງພັກ ໄດ້ຈັດພິທີປະກາດ ຜະລິດຕະພັນການຄົ້ນຄວ້າແນວຄິດໄກສອນ ພົມວິຫານ ກ່ຽວກັບການປ່ຽນແປງໃໝ່ຢູ່ ສປປ ລາວ ໃຫ້ກຽດເຂົ້າຮ່ວມພ້ອມທັງເປັນປະທານເປີດພິທີໂດຍ ສະຫາຍ ບຸນທອງ ຈິດມະນີ ກຳມະການກົມການເມືອງສູນກາງພັກ, ຜູ້ປະຈຳການຄະນະເລຂາທິການສູນກາງພັກ, ຮອງປະທານປະເທດແຫ່ງ ສປປ ລາວ ມີ: ສະຫາຍ ຄຳພັນ ເຜີຍຍະວົງ ເລຂາທິການສູນກາງພັກ, ຫົວໜ້າຄະນະໂຄສະນາອົບຮົມນສູນກາງພັກ, ປະທານສະພາທິດສະດີສູນກາງພັກ, ຜູ້ຊີ້ນຳວຽກງານຄົ້ນຄວ້າແນວຄິດປະທານໄກສອນ ພົມວິຫານ, ມີສະມາຊິກສະພາທິດສະດີສູນກາງພັກ ແລະ ບັນດາຄະນະນຳມາຈາກກະຊວງ-ອົງການອ້ອມຂ້າງເຂົ້າຮ່ວມຢ່າງພ້ອມພຽງ.
ໃນພິທີ ສະຫາຍ ບຸນທອງ ຈິດມະນີ ກຳມະການກົມການເມືອງສູນກາງພັກ, ຜູ້ປະຈຳການຄະນະເລຂາທິ ການສູນກາງພັກ, ຮອງປະທານປະເທດແຫ່ງ ສປປ ລາວ ໄດ້ໃຫ້ກຽດກ່າວເປີດພິທີ ທ່ານໃຫ້ຮູ້ວ່າ: ການຄົ້ນຄວ້າແນວຄິດ ປະທານ ໄກສອນ ພົມວິຫານກ່ຽວກັບການປ່ຽນແປງໃໝ່ຢູ່ ສປປ ລາວ ແມ່ນຜົນສຳເລັດທີ່ມີຄວາມສຳຄັນສຳລັບການສະເຫຼີມສະຫຼອງວັນຄ້າຍວັນ ເກີດຂອງ ປະທານໄກສອນ ພົມວິຫານ ຄົບຮອບ 102 ປີ, ເຊິ່ງສະແດງໃຫ້ເຫັນຜົນງານອັນໃຫຍ່ຫຼວງທີ່ທ່ານ ໄດ້ປະກອບສ່ວນໃຫ້ແກ່ພາລະກິດປະຕິວັດຂອງຊາດ, ປະທານ ໄກສອນ ແມ່ນນັກຮັກຊາດຜູ້ຍິ່ງໃຫຍ່, ແມ່ນລູກຜູ້ປະເສີດຂອງປວງຊົນລາວບັນດາເຜົ່າ, ເປັນຜູ້ນໍາສູງສຸດຂອງການປະຕິວັດລາວ ທີ່ມີຄວາມປີຊາສາມາດ ແລະ ມີຄວາມສະຫຼາດຫຼັກແຫຼມ, ມີໄຫວພິບອັນແຫຼມຄົມ, ມີຄວາມອົງອາດກ້າຫານ, ມີນໍ້າໃຈຕໍ່ ສູ້ທີ່ເດັດດ່ຽວໜຽວແໜ້ນ ແລະ ເປັນຜູ້ນໍາທີ່ແສນເຄົາລົບຮັກຂອງພັກ-ລັດ ແລະ ຂອງປວງຊົນລາວ; ຊີວິດ ແລະ ພາລະກິດປະຕິວັດຂອງປະທານ ໄກສອນ ພົມວິຫານ ໄດ້ຕິດພັນຢ່າງສະໜິດແໜ້ນກັບຂະບວນການວິວັດແຫ່ງການເຕີບໃຫຍ່ຂະຫຍາຍຕົວມີໄຊຂອງພັກ ແລະ ຂອງການປະຕິວັດ. ຜະລິດຕະພັນດັ່ງກ່າວແມ່ນເຂັມທິດເຍືອງທາງອັນໃສແຈ້ງຕໍ່ກັບພາລະກິດການປ່ຽນແປງໃໝ່ຂອງຊາດ, ຢັ້ງຢືນໃຫ້ເຫັນເຖິງຄຸນສົມບັດ ສິນທໍາປະຕິວັດ ຂອງປະທານໄກສອນ ພົມວິຫານ ເຊິ່ງເປັນມໍລະດົກອັນລໍ້າຄ່າ ປະໄວ້ໃຫ້ປວງຊົນລາວທັງຊາດ. ພວກເຮົາຈົ່ງພ້ອມກັນຮໍ່າຮຽນເອົາຄຸນສົມບັດ ສິນທໍາປະຕິວັດອັນສູງສົ່ງ ຂອງປະທານ ໄກສອນ ພົມວິຫານ ແລະ ນຳໄປຜັນຂະຫຍາຍເຂົ້າສູ່ທຸກເປົ້າ ໝາຍດ້ວຍປະສິດທິພາບສູງສຸດ.
