ຄະນະນຳ ຄະນະໂຄສະນາອົບຮົມສູນກາງພັກ ລົງພົບປະໂອ້ລົມພະນັກງານນັກຮົບ-ທະຫານ ໂຮງຮຽນທິດສະດີການເມືອງກອງທັບ ເນື່່ອງໃນໂອກາດວັນສ້າງຕັ້ງກອງທັບປະຊາຊົນລາວ ຄົບຮອບ 74 ປີ (20 ມັງກອນ 1949 – 20 ມັງກອນ 2023)
ໃນວັນທີ 19 ມັງກອນ 2023 , ສະຫາຍ ປອ ຄໍາພັນ ເຜີຍຍະວົງ ເລຂາທິການສູນກາງພັກ, ຫົວໜ້າຄະນະໂຄສະນາ ອົບຮົມສູນກາງພັກ, ປະທານສະພາທິດສະດີສູນກາງພັກ ພ້ອມດ້ວຍຄະນະ ໄດ້ລົງພົບປະໂອ້ລົມ ພະນັກງານ-ນັກຮົບ ໂຮງຮຽນທິດສະດີການເມືອງກອງທັບ ເນື່່ອງໃນໂອກາດວັນສ້າງຕັ້ງກອງທັບປະຊາຊົນລາວ ຄົບຮອບ 74ປີ
ໃນພິທີ ໄດ້ຮັບຟັງການລາຍງານຫຍໍ້ການຈັດຕັ້ງເຄື່ອນໄຫວວຽກງານຮອບດ້ານຂອງ ໂຮງຮຽນທິດສະດີການເມືອງກອງທັບ ໃນໄລຍະ1ປີຜ່ານມາ ຈາກ ສະຫາຍ ພົນຈັດຕະວາ ປອ ຄຳໄພ ຟອງດາລາ ຮອງເລຂາຄະນະພັກ ຫົວໜ້າການທະຫານໂຮງຮຽນທິດສະດີການເມືອງກອງທັບ ເຊີ່ງສະຫາຍໄດ້ຍົກໃຫ້ເຫັນເຖິງການເອົາໃຈໃສ່ຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ, ມະຕິກອງປະຊຸມໃຫຍ່ຄັ້ງທີ V ຂອງອົງຄະນະພັກກະຊວງປ້ອງກັນປະເທດ ໂດຍສະເພາະແມ່ນ 4 ໜ້າທີ່ໃຫຍ່ 26 ແຜນງານ ຫັນເປັນແຜນການລະອຽດເຂົ້າສູ່ຊີວິດຕົວຈິງຂອງກົມກອງດ້ວຍຈິດໃຈບຸກທະລຸ ແລະ ມີຜົນສໍາເລັດຫຼາຍດ້ານ ແລະ ສູ້ຊົນນໍາສະເໜີຂັ້ນເທິງເພື່ອອະນຸມັດຍົກລະດັບຈາກໂຮງຮຽນ ຂຶ້ນເປັນວິທະຍາຄານ ແຕ່ນີ້ຮອດປີ 2025.
ທັງຍົກໃຫ້ເຫັນເຖິງຜົນສຳເລັດໃນການປະຕິບັດຕາມພາລະບົດບາດໜ້າທີ່ຂອງໂຮງຮຽນ ສ້າງນາຍທະຫານວິຊາການ ໃນຂົງເຂດວຽກງານການເມືອງ ມີ 7 ເປົ້າໝາຍ ແລະ ສ້າງນາຍທະຫານນໍາພາຂັ້ນກອງພັນນ້ອຍ, ກອງພັນໃຫຍ່, ກອງພົນ ໄດ້ 5 ເປົ້າໝາຍ ແລະ ສໍາເລັດໄປແລ້ວ 14 ເປົ້າໝາຍ, ຍັງ 4 ເປົ້າໝາຍ, ມີນັກສຶກສາການທະຫານຈົບ ກາຍເປັນພະນັກງານນໍາພາຄຸ້ມຄອງຈຳນວນ 500 ກ່ວາສະຫາຍ.
ຫຼັງຈາກນັ້ນ ທ່ານ ປອ ຄໍາພັນ ເຜີຍຍະວົງ ເລຂາທິການສູນກາງພັກ, ຫົວໜ້າຄະນະໂຄສະນາອົບຮົມສູນກາງພັກ, ປະທານສະພາທິດສະດີສູນກາງພັກ ໄດ້ມີຄໍາເຫັນໂອ້ລົມ ໂດຍໄດ້ສະແດງຄວາມຍ້ອງຍໍຊົມເຊີຍມາຍັງບັນດາສະຫາຍພະນັກງານນັກຮົບ, ຄູອາຈານ, ນັກສຶກສາ ທົ່ວໂຮງຮຽນ ທີ່ໄດ້ພ້ອມກັນຕັ້ງໜ້າເຮັດ ສຳເລັດພາລະກິດປະຕິວັດອັນຍິ່ງໃຫຍ່ ແລະ ໜັກໜ່ວງທີ່ພັກ ແລະ ປະຊາຊົນມອບໝາຍໃຫ້ມີສຳເລັດຜົນ ນອກນັ້ນທ່ານຍັງໄດ້ເນັ້ນບາງບັນຫາທີ່ຕ້ອງໄດ້ເອົາໃຈໃສ່ຄື:
- ເຊີດຊູສະຕິລະວັງຕົວ, ມີສະຕິໃນການປົກປັກຮັກສາແນວທາງນະໂຍບາຍຂອງພັກ-ລັດ, ປົກປັກຮັກສາໝາກຜົນຂອງການປະຕິວັດ, ປົກປັກຮັກສາລະບອບໃໝ່ປະຊາທິປະໄຕປະຊາຊົນ ໄວ້ໃຫ້ໝັ້ນຄົງ; ສົມທົບແໜ້ນວຽກງານການປ້ອງກັນຊາດ-ປ້ອງກັນຄວາມສະຫງົບ ກັບການສ້າງສາພັດທະນາເສດຖະກິດ-ສັງຄົມ; ກອງທັບ ກໍຄືກົມກອງ ຕ້ອງເປັນຫຼັກແຫຼ່ງ, ເປັນພາຫານະອັນແຫຼມຄົມຂອງພັກ ໃນການນຳພາທົ່ວປວງຊົນ ເຮັດວຽກງານປ້ອງກັນຊາດ-ປ້ອງກັນຄວາມສະຫງົບ, ໃນນີ້ ວຽກງານກໍ່ສ້າງຮາກຖານ ກໍຍັງແມ່ນວຽກງານຍຸດທະສາດຕົ້ນຕໍຂອງພັກກໍຄືຂອງທົ່ວກອງທັບເຮົາ.
- ກຳລັງປະກອບອາວຸດຂອງພວກເຮົາ ແມ່ນກຳລັງຂອງພັກ ເຊີ່ງພັກປະຊາຊົນປະຕິວັດລາວເປັນຜູ້ສ້າງຂຶ້ນ ແລະ ກໍ່ເຕີບໃຫຍ່ເຂັ້ມແຂງຂຶ້ນ ຢູ່ໃນການອົບຮົມບົ່ມສອນຂອງພັກມາໂດຍຕະຫຼອດ. ດັ່ງນັ້ນ, ບໍ່ວ່າຈະຢູ່ໃນໄລຍະໃດ ກໍ່ຕ້ອງຮັບປະກັນຄວາມຈົ່ງຮັກພັກດີຢ່າງສຸດຊຶ້ງຕໍ່ພາລະກິດຂອງພັກ ແລະ ປະເທດຊາດ; ທົ່ວກອງທັບ ກໍຄືກົມກອງ ຕ້ອງຢູ່ໃຕ້ການນຳພາເດັດຂາດໂດຍກົງ ແລະ ຮອບດ້ານຂອງພັກ, ຫົວໜ່ວຍກົມກອງຕ່າງໆ ຕ້ອງຢູ່ໃຕ້ການນຳພາຂອງຄະນະພັກຂັ້ນຂອງຕົນ.
- ສືບຕໍ່ປົກປັກຮັກສາ ແລະ ເສີມຂະຫຍາຍມູນເຊື້ອອັນດີງາມຂອງຕົນ, ຕ້ອງຕັ້ງໜ້າປັບປຸງກຳລັງໃນທຸກດ້ານໃຫ້ໜັກແໜ້ນເຂັ້ມແຂງ, ເອົາໃຈໃສ່ຕໍ່ການປັບປຸງລະບອບຄຸ້ມຄອງ-ບັນຊາ, ປັບປຸງກຳລັງປະເພດຕ່າງໆ ໂດຍຖືເອົາຄຸນນະພາບເປັນຕົ້ນຕໍ ໃນນັ້ນ ຖືເອົາຄຸນນະພາບທາງດ້ານການເມືອງ-ແນວຄິດເປັນກົກ, ເອົາຄວາມສາມາດ ດ້ານວິຊາສະເພາະ, ຫົວຄິດປະດິດສ້າງ ແລະ ການຈັດຕັ້ງບັນຊາເປັນສິ່ງສຳຄັນ; ຕ້ອງມີແຜນການ ແລະ ປະຕິບັດລະບອບຫັດແອບ ເພື່ອຍົກສູງຄວາມສາມາດທາງດ້ານສິນລະປະຍຸດ-ຍຸດທະວິທີ, ລະດັບວິຊາສະເພາະໃຫ້ສູງຂຶ້ນ ທັງຍົກສູງສະຕິການຈັດຕັ້ງລະບຽບວິໄນໃຫ້ເຂັ້ມງວດ.
- ຕ້ອງສຸມທຸກເງື່ອນໄຂຄວາມສາມາດ ເພື່ອກ້າວໄປເຖິງການກຸ້ມຕົນເອງ ຢ່າງຮອບດ້ານໃນນັ້ນໃຫ້ຖືເອົາວຽກງານຄຸ້ມຄອງ, ລ້ຽງດູກອງທັບ ດ້ວຍການສ້າງພະລາທິການກັບທີ່ເປັນວຽກງານຕົ້ນຕໍ ເພື່ອແກ້ໄຂຄວາມຫຍຸ້ງຍາກຝືດເຄືອງດ້ານຊີວິການເປັນຢູ່ ໂດຍສຸມໃສ່ດ້ານກະສິກຳທີ່ເປັນທ່າແຮງ (ການປູກຝັງ, ລ້ຽງສັດ) ໃຫ້ເປັນຂະບວນ, ຂະຫຍາຍດ້ານການບໍລິການທີ່ຕິດພັນກັບຂົງເຂດປ້ອງກັນຊາດ ໃຫ້ຄ່ອຍເພີ່ມຂຶ້ນ ຕາມເງື່ອນໄຂ.
- ປະຕິບັດແນວທາງການຕ່າງປະເທດ ສັນຕິພາບ, ເອກະລາດ, ມິດຕະພາບ ແລະ ຮ່ວມມືກັບປະເທດຕ່າງໆ, ປັບປຸງ ແລະ ເພີ່ມທະວີການຮ່ວມມືຮອບດ້ານກັບກອງທັບ ເພື່ອນມິດຍຸດທະສາດ (ສສ. ຫວຽດນາມ ແລະ ສປ.ຈີນ) ແລະ ການຮ່ວມມືກັບບັນດາປະເທດສັງຄົມນິຍົມອ້າຍນ້ອງ ກໍ່ຄືເພື່ອນມິດທີ່ກ້າວໜ້າໃຫ້ດີ, ຍາດແຍ່ງການຊ່ວຍເຫຼືອຈາກສາກົນ ເພື່ອປັບປຸງກໍ່ສ້າງກອງທັບພວກເຮົາໃຫ້ມີຄວາມເຂັ້ມແຂງຢ່າງບໍ່ຢຸດຢັ້ງ.
ເພື່ອອະນາຄົດອັນສົດໃສຂອງປະເທດຊາດ, ພວກເຮົາຈົ່ງພ້ອມກັນເສີມຂະຫຍາຍມູນເຊື້ອແລະ ຜົນງານທີ່ຍາດມາໄດ້, ສືບຕໍ່ປະຕິບັດແນວທາງປ່ຽນແປງໃໝ່ຂອງພັກ, ປະຕິບັດໜ້າທີ່ການເມືອງຂອງກອງທັບໃຫ້ມີໝາກຜົນດີກວ່າເກົ່າ, ນຳພາກົມກອງກ້າວຂຶ້ນສ້າງທ່ວງທ່າໃໝ່ຢ່າງໜັກແໜ້ນ.
ຫຼັງຈາກນັ້້ນໂຮງຮຽນທິດສະດີການເມືອງກອງທັບ ກໍ່ໄດ້ມອບກະຕ່າດອກໄມ້ເພື່ອສະແດງຄວາມຂອບໃຈຕໍ່ການນຳພັກລັດກໍ່ຄືຄະນະໂຄສະນາອົບຮົມທິ່ໄດ້ລົງມາຢ້ຽມຢາມ ແລະ ຄະນະໂຄສະນາອົບຮົມສູນກາງພັກ ກໍ່ໄດ້ມອບເຄື່ອງຈຳນວນໜື່ງ ພ້ອມເງິນສົດຈຳນວນ 30.000.000 ກີບ ເພື່ອເປັນກຳລັງໃຈ ໃຫ້ແກ່ ໂຮງຮຽນທິດສະດີການເມືອງກອງທັບ.
ພາຍຫຼັງສຳເລັດພິທີແລ້ວ ທາງຄະນະນຳຂອງໂຮງຮຽນທິດສະດີການເມືອງ ຍັງໄດ້ນຳພາຄະນະຜູ້ແທນ ຄອສພ ຢ້ຽມຊົມ ຫ້ອງການ, ຫ້ອງຮຽນ ແລະ ບ່ອນເຮັດວຽກຂອງບັນດາຄູອາຈານ ຊ່ຽວຊານ ແລະ ພື້ນຖານໂຄງຮ່າງຈໍານວນໜຶ່ງ ພາຍໃນໂຮງຮຽນທິດສະດີການເມືອງກອງທັບ.
