ກອງປະຊຸມຝຶກອົບຮົມແນະນຳວິທີວິທະຍາ ການຂຽນສະຫຼຸບ 40 ປີການຈັດຕັ້ງປະຕິບັດແນວທາງປ່ຽນແປງໃໝ່ຮອບດ້ານມີຫຼັກການຂອງພັກ
ໃນຕອນເຊົ້າວັນທີ 04 ທັນວາ 2024 ຫ້ອງການສະພາທິດສະດີສູນກາງພັກ ຈັດກອງປະຊຸມຝຶກອົບຮົມກອງປະຊຸມຝຶກອົບຮົມແນະນຳວິທີວິທະຍາ ການຂຽນສະຫຼຸບ 40 ປີການຈັດຕັ້ງປະຕິບັດແນວທາງປ່ຽນແປງໃໝ່ຮອບດ້ານມີຫຼັກການຂອງພັກ ໂດຍພາຍໃຕ້ການເປັນປະທານຂອງສະຫາຍ ຄຳມອນ ຈັນທະຈິດ ຮອງ ຄອສພ, ຮອງປະທານຜູ້ປະຈຳການ ສທພ, ໃນນັ້ນໄດ້ມີຜູ້ເຂົ້າຮ່ວມໃນການຝຶກອົບຮົມປະກອບມີຕາງໜ້າຄະນະຮັບຜິດຊອບຂຽນຕົວຈິງຂອງແຕ່ລະຂົງເຂດ ຄື: ຊົງເຂດການເມືອງ, ຂົງເຂດເສດຖະກິດ, ຂົງເຂດວັດທະນະທຳ-ສັງຄົມ, ຂົງເຂດແນວໂຮມ-ອົງການຈັດຕັ້ງມະຫາຊົນ, ຂົງເຂດປ້ອງກັນຊາດ-ປ້ອງກັນຄວາມສະຫງົບ ແລະ ການຕ່າງປະເທດ, ຂົງເຂດອຳນາດລັດ ເຊິ່ງມີຜູ້ເຂົ້າຮ່ວມທັງໝົດ 60 ກວ່າຄົນ.
ກອງປະຊຸມຄັ້ງນີ້ຈຸດປະສົງກໍເພື່ອສ້າງຄວາມຮູ້ເຮັດໃຫ້ພະນັກງານຮູ້ວິທີການຂຽນສະຫຼຸບ 40 ປີການຈັດຕັ້ງປະຕິບັດແນວທາງປ່ຽນແປງໃໝ່ ຄວາມສໍາຄັນ ຂອງແນວທາງປ່ຽນແປງໃໝ່ ຮອບດ້ານມີຫຼັກການຂອງພັກຢູ່ໃນແຕ່ລະຂົງເຂດວຽກງານ, ການສະຫຼຸບແນວທາງປ່ຽນແປງໃໝ່ ຕ້ອງໄດ້ຍຶດຫມັ້ນຕາມ 6 ຫຼັກການ:
- ຢຶດຫມັ້ນຈຸດຫມາຍສັງຄົມນິຍົມ;
- ຢຶດໝັ້ນລັດທິມາກ-ເລນິນ ແລະ ຫມູນໃຊ້ຢ່າງປະດິດສ້າງ, ສອດຄ່ອງກັບຈຸດພິເສດ ຂອງປະເທດເຮົາ;
- ຢຶດໝັ້ນໃນການນໍາພາຂອງພັກ, ເພີ່ມທະວີຄວາມສາມັກຄີເປັນເອກະພາບພາຍໃນພັກບົນພື້ນຖານຫຼັກການລວມສູນປະຊາທິປະໄຕແລະແນວທາງຂອງພັກ;
- ເສີມຂະຫຍາຍປະຊາທິປະໄຕ ແລະ ສິດເປັນເຈົ້າຂອງປະຊາຊົນບັນດາເຜົ່າ, ສ້າງກໍາລັງສາມັກຄີທົ່ວປວງຊົນ ແລະ ຄວາມເປັນປຶກແຜ່ນຂອງຊາດລາວເອກະພາບ;
- ເພີ່ມທະວີຄວາມສັກສິດ ຂອງລະບົບອໍານາດປະຊາທິປະໄຕ ປະຊາຊົນ, ອີງໃສ່ກໍາລັງແຮງຂອງປະຊາຊົນ ແລະ ເພື່ອປະຊາຊົນ, ຕ້ານປະກົດການພະຍາດອາດຍາສິດທຸກຮູບແບບ;
- ເຊີດຊູຈິດໃຈເອກະລາດ ເປັນເຈົ້າຕົນເອງ, ສົມທົບກໍາລັງແຮງຂອງຍຸກສະໄຫມ.
ກອງປະຊຸມຝຶກອົບຮົມແນະນຳວິທີວິທະຍາ ການຂຽນສະຫຼຸບ 40 ປີການຈັດຕັ້ງປະຕິບັດແນວທາງປ່ຽນແປງໃໝ່ຮອບດ້ານມີຫຼັກການຂອງພັກໄດ້ອັດລົງໃນເວລາ11:30 ຂອງວັນດຽວກັນ.
