ກອງປະຊຸມປະກາດການຈັດຕັ້ງ ແລະ ເຜີຍແຜ່ພາລະບົດບາດສະພາທິດສະດີສູນກາງພັກ
ໃນວັນທີ 22 ມີນາ 2022 ທີ່ຫ້ອງປະຊຸມສະພາທິດສະດີສູນກາງພັກ ໄດ້ຈັດກອງປະຊຸມປະກາດ ການຈັດຕັ້ງ ແລະ ເຜີຍແຜ່ ພາລະບົດບາດສະພາທິດສະດີສູນກາງພັກ ພາຍໃຕ້ການເປັນປະທານຂອງ ສະຫາຍ ຄຳພັນ ເຜີຍຍະວົງ ເລຂາທິການສູນກາງພັກ, ຫົວໜ້າຄະນະໂຄສະນາອົບຮົມສູນກາງພັກ, ປະທານສະພາທິດສະດີສູນກາງພັກ, ມີບັນດາທີ່ປຶກສາລະດັບສູງ, ຮອງປະທານສະພາທິດສະດີສູນກາງພັກ ແລະ ສະມາຊິກສະພາທິດສະດີສູນກາງພັກເຂົ້າຮ່ວມຢ່າງພ້ອມພຽງ.
ຈຸດປະສົງເພື່ອເປັນບ່ອນອີງໃຫ້ການເຄື່ອນໄຫວວຽກງານຂອງ ສທພ ໄດ້ດຳເນີນໄປຢ່າງມີຈຸດສຸມ ແລະ ບັນລຸຕາມຈຸດປະສົງທີ່ກຳນົດໄວ້, ເພື່ອຮັບປະກັນການເປັນເສນາທິການໃຫ້ແກ່ກົມການເມືອງສູນກາງພັກ, ຄະນະເລຂາທິການສູນກາງພັກ ແລະ ລັດຖະບານ ໃນການດຳເນີນການຄົ້ນຄວ້າທາງດ້ານທິດສະດີ ແລະ ສະຫຼຸບພຶດຕິກຳໃຫ້ເລິກເຊິ່ງ, ແທດເໝາະກັບສະພາບຕົວຈິງ, ມີວິທະຍາສາດເພື່ອຮັບໃຊ້ໃຫ້ແກ່ການວາງແນວທາງການເມືອງໃຫ້ຖືກຕ້ອງແຕ່ລະໄລຍະ, ເພື່ອເຮັດໃຫ້ການປະຕິວັດພາລະບົດບາດຂອງ ສທພ ມີຄວາມໜັກແໜ້ນເລິກເຊິ່ງ ແລະ ສາມາດແລກປ່ຽນຖອດຖອນບົດຮຽນກັບປະເທດເພື່ອນມິດໄດ້ຢ່າງເລິກເຊິ່ງ ແລະ ເປັນລະບົບຕໍ່ເນື່ອງ, ເພື່ອໃຫ້ບັນດາລະບຽບການ ແລະ ນິຕິກຳທີ່ກ່ຽວຂ້ອງຕ່າງໆຂອງ ສທພ ສຳເລັດໂດຍພື້ນຖານ ແລະ ສາມາດປະສານງານກັບພາກສ່ວນກ່ຽວຂ້ອງທັງພາຍໃນ ແລະ ຕ່າງປະເທດ ໄດ້ຢ່າງຄ່ອງແຄ້ວ, ວ່ອງໄວທ່ວງທັນກັບເວລາ, ເພື່ອຍົກລະດັບຄວາມສາມາດ, ແບບແຜນວິທີ່ເຮັດວຽກ, ກົນໄກການເຮັດວຽກໄດ້ສອດຄ່ອງ ແລະ ມີປະສິດທິຜົນ, ບັນລຸຕາມຈຸດປະສົງ ແລະ ລະດັບຄາດໝາຍ ໃນແຕ່ລະໜ້າວຽກໃນປີ 2022 ແລະ ກ້າວໄປເຖິງການວາງທິດທາງແຜນການເຄື່ອນໄຫວໃນຕໍ່ໜ້າຢ່າງຕໍ່ເນື່ອງ ແລະ ມີປະສິດທິພາບ.
ໃນພິທີໄດ້ຮັບຟັງການປະກາດການຈັດຕັ້ງສະພາທິດສະດີສູນກາງພັກ, ການປະກາດແຕ່ງຕັ້ງສະມາຊິກສະພາທິດສະດີສູນກາງພັກ, ແຕ່ງຕັ້ງປະທານສະພາທິດສະດີສູນກາງພັກ, ທີ່ປຶກສາ, ຮອງປະທານ, ຫົວໜ້າ, ຮອງຫົວໜ້າກຳມະການດ້ານຕ່າງໆ, ຫົວໜ້າ ແລະ ຮອງຫົວໜ້າຄະນະເລຂາທິການວິທະຍາສາດ ແລະ ຫົວໜ້າຫ້ອງການສະພາທິດສະດີສູນກາງພັກ; ໄດ້ລາຍງານສະພາບການເຄື່ອນໄຫວວຽກງານຂອງສະພາທິດສະດີສູນກາງພັກໃນໄລຍະຜ່ານມາ, ແຜນດຳເນີນງານຂອງສະພາທິດສະດີສູນກາງພັກສົກປີ 2022 ແລະ ຍັງໄດ້ໃຫ້ສະມາຊິກປະກອບຄຳຄິດຄຳເຫັນຕ່າງໆ ຢ່າງກົງໄປກົງມາເພື່ອເຮັດໃຫ້ວຽກງານຂອງ ສທພ ດຳເນີນໄປຕາມແຜນທີ່ກຳນົດໄວ້.
ທ້າຍພິທີປະທານໄດ້ມີຄຳເຫັນໂອ້ລົມ ແລະ ເນັ້ນໜັກໃຫ້ສະມາຊິກ ສທພ ຈົ່ງສືບຕໍ່ຍົກສູງຄວາມສາມາດໃນການປະຕິບັດພາລະບົດບາດ, ໜ້າທີ່ຂອງຕົນທີ່ຕິດພັນກັບຄວາມຮຽກຮ້ອງຕ້ອງການຂອງວຽກງານທິດສະດີການເມືອງໃນເງື່ອນໄຂໃໝ່ທີ່ກອງປະຊຸມໃຫຍ່ຄັ້ງທີ XI ຂອງພັກວາງອອກ, ຍົກສູງຄຸນນະພາບ, ປະສິດທິຜົນຂອງການໃຫ້ຄຳປຶກສາທາງດ້ານທິດສະດີການເມືອງໃຫ້ເຂັ້ມແຂງ, ເລິກເຊິ່ງ ແລະ ຮອບດ້ານກໍຄືການນຳພາ-ຊີ້ນຳແກ້ໄຂບັນຫາຕ່າງໆທີ່ເກີດຂຶ້ນໃຫ້ດີກວ່າເກົ່າ, ສືບຕໍ່ການຮ່ວມມືກັບພັກກອມມູນິດຫວຽດນາມ, ພັກກອມມູນິດຈີນ ໃນວຽກງານທິດສະດີການເມືອງເປັນຕົ້ນແມ່ນການຈັດຕ້ັງສຳມະນາທິດສະດີ 2 ພັກ ແລະ ສຸມໃສ່ແຜນວຽກງານຈຸດສຸມຮອດປີ 2025 ໃຫ້ໄດ້ຮັບປະສົບຜົນສຳເລັດຕາມຄາດໝາຍທີ່ວາງໄວ້.
