ໃນລະຫວ່າງວັນທີ 28-29 ກໍລະກົດ ປີ 2022 ຜ່ານມານີ້ຄະນະໂຄສະນາອົບຮົມສູນກາງພັກ ໄດ້ສົມທົບກັບຄະນະໂຄສະນາອົບຮົມແຂວງຄຳມ່ວນ ແລະ ຄະນະໂຄສະນາອົບຮົມເມືອງນາກາຍ ຈັດຕັ້ງອົບຮົມຄວາມຮູ້ພື້ນຖານດ້ານການເມືອງ-ການປົກຄອງ ແລະ ການສ້າງບ້ານພັດທະນາ, ປະຊາຊົນຢູ່ລຽບຕາມຊາຍແດນ ຊຶ່ງໄດ້ຈັດຂຶ້ນຢູ່ທີ່ຫ້ອງການບ້ານ ບ້ານໝາກເຟືອງ ເມືອງນາກາຍ ແຂວງຄຳມ່ວນ ໂດຍການເປັນປະທານຂອງທ່ານ ແສງແກ້ວ ພະຄຸນທອງ ກຳມະການປະຈຳພັກເມືອງ ຮອງເຈົ້າເມືອງນາກາຍ, ທ່ານ ຄຳເຄນ ຈັນທະວົງ ຫົວໜ້າກົມອົບຮົມ ຄະນະໂຄສະນາອົບຮົມສູນກາງພັກ, ມີທ່ານ ອຸດອນ ສຸກທິລາດ ຮອງຫົວໜ້າຄະນະໂຄສະນາອົບຮົມແຂວງຄຳມ່ວນ.
ຊຸດຮົມຄັ້ງນີ້ມີຜູ້ເຂົ້າຮ່ວມທັງໝົດ 61 ທ່ານ, ຍິງ 14 ທ່ານ ໃນນັ້ນ; ປະກອບມີເລຂາໜ່ວຍພັກບ້ານ, ຄະນະໜ່ວຍພັກບ້ານ, ນາຍບ້ານ, ຫົວໜ້າບັນດາອົງການຈັດຕັ້ງມະຫາຊົນຂອງບ້ານ, ພະນັກງານຄູ, ແພດໝໍ ແລະ ປກຊ-ປກສ ທີ່ປະຈຳຢູ່ກຸ່ມບ້ານໝາກເຟືອງ, ເນື້ອໃນເອກະສານອົບຮົມປະກອບມີ: ຊາດລາວ, ຄົນລາວ ແລະ ມູນເຊື້ອອັນສະຫງ່າລາສີຂອງປະຊາຊົນລາວ, ລະບົບການເມືອງ ແລະ ການປົກຄອງ ໃນລະບອບປະຊາທິປະໄຕປະຊາຊົນ, ການສ້າງບ້ານເປັນຫົວໜ່ວຍພັດທະນາ, ການແກ້ໄຂຄວາມທຸກຍາກ ແລະ ການຜະລິດເປັນສິນຄ້າ, ແນວທາງປ້ອງກັນຊາດ-ປ້ອງກັນຄວາມສະຫງົບທົ່ວປວງຊົນຮອບດ້ານ ແລະ ເອກະສານອົບຮົມປະຊາຊົນຢູ່ລຽບຕາມຊາຍແດນ (11 ຄຳຖາມ-ຄຳຕອບ).
ການຈັດຕັ້ງອົບຮົມໃນຄັ້ງນີ້ແມ່ນເປັນການສ້າງບາດກ້າວບຸກທະລຸທາງດ້ານຈິນຕະນາການ (ແນວຄິດ) ໃຫ້ແກ່ສະມາຊິກພັກ-ພະນັກງານ, ນາຍບ້ານ ທັງເປັນການຍົກລະດັບຄວາມຮັບຮູ້-ເຂົ້າໃຈກ່ຽວກັບແນວທາງນະໂຍບາຍຂອງພັກ, ລະບຽບການຕ່າງໆໃນການປົກຄອງຂອງລັດ ແລະ ແນວທາງປ້ອງກັນຊາດ-ປ້ອງກັນຄວາມສະຫງົບ. ເພື່ອເຮັດໃຫ້ຜູ້ເຂົ້າອົບຮົມມີຄວາມເຂົ້າໃຈຕໍ່ແນວທາງນະໂຍບາຍຂອງພັກ, ລະບຽບການຕ່າງໆຂອງລັດຫຼາຍຂຶ້ນ ແລະ ສາມາດຊີ້ນຳ-ນຳພາບໍລິຫານບ້ານໃຫ້ມີຄວາມໜັກແໜ້ນ, ເຂັ້ມແຂງ, ນຳພາແກ້ໄຂຄວາມທຸກຍາກຂອງປະຊາຊົນ ໃຫ້ບັນລຸຕາມຄາດໝາຍທີ່ພັກເຮົາວາງໄວ້ ພ້ອມທັງສາມາດນຳໄປສຶກສາອົບຮົມປະຊາຊົນ ພາຍໃນບ້ານໃຫ້ມີຄວາມເຂົ້າໃຈຢ່າງເລິກເຊີ່ງ ແລະ ຈັດຕັ້ງປະຕິບັດໄດ້ຢ່າງຖືກຕ້ອງຕາມແນວທາງນະໂຍບາຍຂອງພັກ, ລະບຽບກົດໝາຍຂອງລັດທີ່ວາງອອກໃນແຕ່ລະໄລຍະຢ່າງເຂັ້ມງວດ.
ນອກຈາກການຝຶກອົບຮົມ ຍັງໄດ້ຮັບຟັງການປາຖະກະຖາສອງວັນປະຫວັດສາດມິດຕະພາບລາວ-ຫວຽດນາມຄື: ວັນເຊັນສົນທິສັນຍາການຮ່ວມມືລາວ-ຫວຽດນາມ ຄົບຮອບ 45 ປີ ແລະ ວັນສ້າງຕັ້ງສາຍພົວພັນລາວ-ຫວຽດນາມ ຄົບຮອບ 60 ປີ (5/9/1962-5/9/2022) ພ້ອມກັນນັ້ນຍັງໄດ້ຮັບຟັງການເລົ່າມູນເຊື້ອວັນສ້າງຕັ້ງສະຫະພັນແມ່ຍິງລາວ ຄົບຮອບ 67 ປີ ( 20/7/1955-20/7/2022 ຫຼັງຈາກສຳເລັດການອົບຮົມແລ້ວໄດ້ມີການຖອດຖອນບົດຮຽນ ພ້ອມທັງໂອ້ລົມ ແລະ ມອບໃບຢັ້ງຢືນໂດຍທ່ານ ແສ້ງແກ້ວ ພະຄຸນທອງ ກຳມະການປະຈຳພັກເມືອງ ຮອງເຈົ້າເມືອງນາກາຍ ແຂວງຄຳມ່ວນ.
ພາບ,ຂ່າວ: ກິຕ້ອມ ພັນທະວົງ