ອົບຮົມທິດສະດີ–ແນວທາງ ໃຫ້ຄູ–ອາຈານສອນວິຊາສັງຄົມ–ການເມືອງ ຢູ່ອ້ອມຂ້າງເມືອງໄຊ ແຂວງອຸດົມໄຊ
ໃນລະຫວ່າງວັນທີ 12-13 ກໍລະກົດ 2023 ຄະນະໂຄສະນາອົບຮົມສູນກາງພັກ (ກົມອົບຮົມ) ໄດ້ສົມທົບກັບຄະນະໂຄສະນາອົບຮົມແຂວງອຸດົມໄຊ ຈັດຕັ້ງອົບຮົມທິດສະດີ-ແນວທາງ ໃຫ້ຄູ-ອາຈານສອນວິຊາສັງຄົມ-ການເມືອງ ຢູ່ອ້ອມຂ້າງເທດສະບານເມືອງໄຊ ແຂວງອຸດົມໄຊ ຊຸດອົບຮົມດັ່ງກ່າວໄດ້ຈັດຂຶ້ນທີ່ຫ້ອງປະຊຸມສູນໄອຊິທີ (ICT) ໂຮງຮຽນ ມສ ໜອງແມງດາ ເມືອງໄຊ ແຂວງອຸດົມໄຊ ໂດຍການເປັນປະທານຂອງສະຫາຍ ມໍ ຊົງ ກຳມະການປະຈຳພັກແຂວງ ຫົວໜ້າຄະນະໂຄສະນາອົບຮົມແຂວງອຸດົມໄຊ, ມີສະຫາຍຄຳກອງ ທຳມະເທວາ ຄະນະພັກ ຫົວໜ້າກົມອົບຮົມ ຄະນະໂຄສະນາອົບຮົມສູນກາງພັກ ພ້ອມດ້ວຍນັກອົບຮົມເຂົ້າຮ່ວມ.
ຊຸດອົບຮົມດັ່ງກ່າວມີຜຸ້ເຂົ້າຮ່ວມທັງໝົດ 37 ສະຫາຍ, ຍິງ 18 ສະຫາຍທີ່ມາຈາກໂຮງຮຽນ ມສ ຫ້ວຍຂຸມ, ໂຮງຮຽນ ມສ ດອນໄຊ, ສູນສຶກສານອກໂຮງຮຽນ ແລະ ວິທະຍາໄລວິຊາຊີບແບບປະສົມປະສານ ຊຶ່ງເນື້ອໃນອົບຮົມປະກອບມີ: 1. ຄວາມຮູ້ພື້ນຖານກ່ຽວກັບທິດສະດີມາກ-ເລນິນ, 2. ເສີມຂະຫຍາຍມູນເຊື້ອຂອງຊາດລາວ, 3. ສ້າງ ແລະ ບູລະນະລະບອບປະຊາທິປະໄຕປະຊາຊົນ-ຕາມທິດສັງຄົມນິຍົມ, 4. ແນວທາງການສຶກສາຂອງພັກເຮົາ, 5. ພັດທະນາເສດຖະກິດຕິດພັນກັບການະດທະນາວັດທະນະທຳ-ສັງຄົມ ແລະ 6. ຈັນຍາບັນຂອງຄູ.
ຈຸດປະສົງຂອງການອົບຮົມໃນຄັ້ງນີ້ແມ່ນເພື່ອເປັນການຍົກລະດັບຄວາມຮູ້ທາງດ້ານທິດສະດີ ແລະ ແນວທາງຂອງພັກ, ຮັບຮູ້-ເຂົ້າໃຈກ່ຽວກັບແນວທາງການພັດທະນາເສດຖະກິດ, ແນວທາງການສຶກສາຂອງພັກ-ລັດເຮົາ ແລະ ຈັນຍາບັນຂອງຄູ ເພື່ອເຮັດໃຫ້ບັນດາຄູ-ຈານທີ່ເຂົ້າຮ່ວມອົບຮົມມີທັດສະນະຫຼັກໝັ້ນທີ່ໜັກແໜ້ນ, ມີຈັນຍາບັນຂອງຄວາມເປັນຄູອາຈານ ແລະ ມີຄວາມເຊື່ອໝັ້ນຕໍ່ການນຳພາຂອງພັກ, ເຫັນແຈ້ງຕໍ່ອານາຄົດອັນດີຂອງປະເທດຊາດ ແລະ ສືບຕໍ່ເຮັດສຳເລັດໜ້າທີ່ການງານຂອງຕົນທີ່ໄດ້ຮັບມອບໝາຍ.
ພາຍຫຼັງສຳເລັດການອົບຮົມແລ້ວກໍໄດ້ມີການສະຫຼຸບຖອດຖອນບົດຮຽນພ້ອມທັງມອບໃບຢັ້ງຢືນ ແລະ ໄດ້ຮັບກຽດໃຫ້ການໂອ້ລົມຈາກສະຫາຍ ມໍ ຊົງ ກຳມະການປະຈຳພັກແຂວງ ຫົວໜ້າຄະນະໂຄສະນາອົບຮົມແຂວງຕື່ມອີກ.
ຂ່າວ: ກິຕ໋ອມ ພັນທະວົງ