ກົມໂຄສະນາ ຄອສພ ໄດ້ຈັດພິທີເລື່ອນສະມາຊິກສໍາຮອງຂຶ້ນສົມບູນ
ໂດຍ: ສີໄຄ ໄຊຍະວົງ
ຕອນເຊົ້າຂອງວັນທີ 6/4/2022 ທີ່ຜ່ານມານີ້ ກົມໂຄສະນາ ຄະນະໂຄສະນາອົບຮົມສົນກາງພັກ ໄດ້ຈັດພິທີ່ເລື່ອນສະມາຊິກພັກສຳຮອງຂຶ້ນ ເປັນສະມາຊິກພັກສົມບູນ, ໂດຍການໃຫ້ກຽດເປັນປະທານຂອງ ສະຫາຍ ລາວປາວຊົງ ນະວົງໄຊ ກໍາມະການສູນກາງພັກ, ຮອງເລຂາຄະນະບໍລິຫານງານພັກ, ຮອງຫົວໜ້າຄະນະໂຄສະນາອົບຮົມສູນກາງພັກ; ມີຄະນະໜ່ວຍພັກ, ຜູ້ຕ່າງໜ້າຈາກບັນດາໜ່ວຍພັກອ້ອມຂ້າງ ຄອສພ ແລະ ສະມາຊິກພັກສົມບູນ ແລະ ສຳຮອງ ພາຍໃນໜ່ວຍພັກເຂົ້າຮ່ວມທັງໝົດ 20 ກວ່າສະຫາຍ.
ໃນພິທີ່ດັ່ງກ່າວ ສະຫາຍ ລີຈາວ ໄຊເຍ່ຍຊ່າງ ຮອງເລຂາໜ່ວຍພັກ ໄດ້ຂຶ້ນຜ່ານມະຕິຕົກລົງສະບັບເລກທີ 05/ຄພ.ຄອສພ ລົງວັນທີ 17/ 03 / 2022 ວ່າດ້ວຍການອະນຸມັດເລື່ອນສະມາຊິກພັກສຳຮອງເປັນສະມາຊິກພັກສົມບູນ ຈຳນວນ 02 ສະຫາຍ ທີ່ໄດ້ຜ່ານການຝຶກຝົນຫຼໍ່ຫຼອມທາງດ້ານຄຸນທາດການເມືອງຄຸນສົມບັດສິນທຳປະຕິວັດ ແລະ ກົດລະບຽບຂອງພັກສະໄໝສໍາຮອງ ເປັນໄລຍະເວລາໜຶ່ງປີເຕັມ. ຫຼັງຈາກນັ້ນໄດ້ສະເໜີ ສະຫາຍ ພວງມາລີ ອັກຄະມູນຕີ ເລຂາໜ່ວຍພັກ ກົມໂຄສະນາຂື້ນມີຄໍາເຫັນຮັບເອົາສະມາຊິກພັກສົມບູນໃໝ່ທັງ 2 ສະຫາຍຢ່າງເປັນທາງການ.
ໃນໂອກາດດັ່ງກ່າວ ສະຫາຍ ລາວປາວຊົງ ນະວົງໄຊ ກໍາມະການສູນກາງພັກ, ຮອງເລຂາຄະນະບໍລິຫານງານພັກ ຄອສພ ກໍ່ໄດ້ມີຄຳເຫັນໂອ້ລົມຕໍ່ສະມາຊິກພັກສົມບູນໃໝ່ທັງ 2 ສະຫາຍໂດຍເພີ່ນໄດ້ກ່າວວ່າ: ພວກສະຫາຍທັງ 2 ແມ່ນໄດ້ມີຄວາມບຸກບື່ນຫ້າວຫັນໃນການຈັດຕັ້ງປະຕິບັດລະບຽບ, ສິດ ໜ້າທີ່ເປັນບັນດາຂໍ້ຫ້າມ ແລະ ໜ້າທີ່ວຽກງານດ້ານວິຊາສະເພາະ ແລະ ບັນດາວຽກງານອື່ນໆ ທີ່ການຈັດຕັ້ງມອບໃຫ້ຢ່າງມີຜົນສຳເລັດ. ສະນັ້ນ ມັນໄດ້ພິສູດໃຫ້ເຫັນແຈ້ງວ່າ ພວກສະຫາຍມີຄວາມບຸກບືນ, ຝຶກຝົນຫຼໍ່ຫຼອມຕົນເອງໃຫ້ກາຍເປັນສະມາຊິກພັກທີ່ສາມາດເຮັດໜ້າທີ່ນຳພາໃນຕໍ່ໜ້າ, ຈຶ່ງສາມາດນຳສະເໜີໃຫ້ເລື່ອນເປັນສະມາຊິກສົມບູນຂອງ ພັກປະຊາຊົນປະຕິວັດລາວ ໃຫ້ສະມາຊິກພັກສົມບູນໃໝ່ທັງ 2 ສະຫາຍຈົ່ງພ້ອມກັນ ຮັກສາມູນເຊື້ອດ້ານຕັ້ງໜ້າໃນໄລຍະຜ່ານມາ ແລະ ຈົ່ງຢືດໝັ້ນໃນ 7 ໜ້າທີ່ ແລະ 11 ຂໍ້ຫ້າມຂອງກົດລະບຽບພັກປະຊາຊົນປະຕິວັດລາວສະໄໝທີ XI ວາງອອກໃຫ້ເຂັ້ມງວດເພື່ອໃຫ້ກາຍເປັນສະມາຊິກພັກທີ່ປອດໃສ, ເຂັ້ມແຂງ ແລະ ໜັກແໜ້ນ ສາມາດເປັນແບບຢ່າງນໍາໜ້າ ແລະ ຮັກສາຄວາມສາມັກຄີເປັນເອກະພາບພາຍໃນພັກ. ພ້ອມກັນນັ້ນ ກໍຈົ່ງຕັ້ງໜ້າຝຶກຝົນຕົນເອງໃນການຊອກຮູ້ຮ່ຳຮຽນບັນດາມະຕິ, ຄຳສັ່ງ, ທິດສະດີມາກ – ເລນິນ, ແນວຄິດໄກສອນ ພົມວິຫານ ແລະ ພາສາຕ່າງປະເທດ ໃຫ້ເລີກເຊິ່ງກວ້າງຂວາງຕື່ມອີກ.
